ئىككى نامەلۇملۇق بىرىنچى دەرىجىلىك تەڭسىزلىك ئىپادىلىگەن تەكشىلىك ساھەسىگە ھۆكۈم قىلىش ئۇسۇلى

تىك بۇلۇڭلۇق كوردىنات تەكشىلىكىدە، l تۈز سىزىقنى ئىككى نامەلۇملۇق بىرىنچى دەرىجىلىك تەڭلىمە Ax+By+C=0 ئارقىلىق ئىپادىلەشكە بولىدۇ. P ( x0 , y0 ) نۇقتا تۈز سىزىق l نىڭ ئۈستىدە يېتىشنىڭ يېتەرلىك ھەم زۆرۈر شەرتى Ax0+By0+C=0 بولۇشتىن ئىبارەت. ئەگەر P نۇقتا l تۈز سىزىقنىڭ ئۈستىدە ياتمىسا، ئۇ ھالدا Ax0+By0+C＞0 ياكى Ax0+By0+C＜0 بولىدۇ ھەمدە ئىككىسىدىن پەقەت بىرسىلا ئورۇنلۇق بولىدۇ.
تۈز سىزىق l تەكشىلىكنى Ax+By+C＞0 ۋە Ax+By+C＜0 دىن ئىبارەت ئىككى دانە يېرىم تەكشىلىككە بۆلىدۇ. ئوخشاش بىر دانە يېرىم تەكشىلىكتىكى نۇقتىلارنىڭ كوردىناتلىرى ئوخشاش بىر تەڭسىزلىكنى قانائەتلەندۈرىدۇ. ئادەتتە بىر دانە ئىككى نامەلۇملۇق بىرىنچى دەرىجىلىك تەڭسىزلىك ئىپادىلىگەن تەكشىلىك ساھەسىنى ئېنىقلاشتا، ئالاھىدە نۇقتا ئۇسۇلى قوللىنىلىدۇ. مەسىلەن، كوردىنات بېشى ياكى كوردىنات ئوقى ئۈستىدىكى مەلۇم بىر نۇقتىنىڭ كوردىناتى ئارقىلىق ئىككى نامەلۇملۇق بىرىنچى دەرىجىلىك تەڭسىزلىك ئىپادىلىگەن تەكشىلىك ساھەسىگە ھۆكۈم قىلىمىز.
ئۇنىڭدىن باشقا تۆۋەندىكى ئۇسۇللار ئارقىلىق تېخىمۇ ئاسان ھۆكۈم قىلىشقا بولىدۇ:
(1) ئەگەر A＞0 بولسا، ئۇ ھالدا تەڭسىزلىك Ax+By+C＞0 تۈز سىزىق Ax+By+C=0 نىڭ ئوڭ تەرىپىدىكى يېرىم تەكشىلىكنى ئىپادىلەيدۇ؛ تەڭسىزلىك Ax+By+C＜0 تۈز سىزىق Ax+By+C=0 نىڭ سول تەرىپىدىكى يېرىم تەكشىلىكنى ئىپادىلەيدۇ.(2) ئەگەر B＞0 بولسا، ئۇ ھالدا تەڭسىزلىك Ax+By+C＞0 تۈز سىزىق Ax+By+C=0 نىڭ ئۈستى تەرىپىدىكى يېرىم تەكشىلىكنى ئىپادىلەيدۇ؛ تەڭسىزلىك Ax+By+C＜0 تۈز سىزىق Ax+By+C=0 نىڭ ئاستى تەرىپىدىكى يېرىم تەكشىلىكنى ئىپادىلەيدۇ.